Stad Brest — Marsilha, ar gortadennoù

Tapout poentoù kentañ ar bloaz disul, setu ar pal.

. Krogad 2, bloavezh Lig 1 2021–2022. 14vet, 0 poent.

Diverradenn verr ar c’hrogad tremenet, e Lens (3–2) :

N’eo ket deuet brav ar c’hrogad evit ar Vrestiz e ti Lens. Trec’het int bet d’un doare taer o tiskouez e vo kudennoù e-leizh ar bloaz-mañ a-benn chom e Lig 1. Petra ‘vo lavaret neuze diwar-benn ar c’hrogad-se…

C’hoarierien evel Herelle ha Brassier a zo bet beuzet ‘vel morse. Forzh penaos, lakaet eo bet gwask kerkent gant Lens war ar Vrestiz, gant ur Fofana er c’hreiz en deus rastellet leun a vellioù, un Openda evitañ re aes da lakaat diaes an difennerien hag ur Sotoca e pep lec’h, o vezañ war evezh en un dagadenn eus Lens, gant ur penn hag an troad ‘barzh kein an difenn. Hag An trolle en deus bet da c’hwitout un tenn-kastiz da 1–0 a-raok an hanter-amzer, harzet brav gant Bizot. Ne oa digarez ebet neuze evit dihuniñ ar c’hostez brestad gant ma oa 3–0 ar c’hont goude 65 munutenn. Tenn Haris diarbennet gant Danso ha tenn-kastiz Del Castillo, c’hwitet da gentañ penn ha lakaet er foñs d’an eil tro, n’o deus ket tamm ebet lakaet da zigareziñ ar c’hrogad mezhus kaset da benn.

PLM er c’hreiz gant Belkebla, n’eo ket ken fall evit an dazont.

Brest a zo neuze bet trec’het e ti Lens daoust m’eo bet kaset ur respont e fin, goude an 3 fal lakaet gant Sotoca. Ret eo mont war-raok, n’eo ket fin ar bed ha gwashoc’h nije gallet bezañ bet ar c’hrogad. C’hoarier ar c’hrogad kostez brestad a zo bet Bizot, n’eo ket bet diaes tamm ebet da gavout unan. Ar c’hoarier nemetañ ‘bet a live Lig 1.

Palioù : Sotoca (27, 62, 65mn) evit Lens. Belkebla (67mn) ha Del Castillo (82mn w.t-k) evit Brest.

Bizot — Fadiga (Duverne, 40mn), Chardonnet (K), Herelle (Dari, 74mn), Brassier — Belkebla, Lees-Melou (Le Douaron, 87mn) — Honorat, Pereira-Lage, Belaïli (Magnetti, 74mn) — Cardona (Del Castillo, 74mn).

Big Bizot.

An notennoù :

Bizot, 7. Ar gward a zo bet ar c’hoarier nemetañ a live evit distro al Lig 1. Savetaet en deus un tenn-kastiz, un tenn dañjerus-tre a-raok an hanter-amzer ha pouezus eo evit kas lusk met ivez war an tennoù-korn. N’eo ket bet sikouret.

Fadiga (NE). Erlec’hiet gant Duverne, 4. Fadiga a zo un adreger, plijout a ra dezhañ mont war-raok hag un dra vat e vo gant Duverne war ar c’hostez all. Ret e vo diwall neuze gant an enep-argadoù ar skipailh all. Perak ket c’hoari e 5–3–2 neuze.

Herelle, 2,5. N’eo ket posubl ken. Dari ha buan mar plij. Erlec’hiet gant un Dari (74mn) a rank bezañ gwelet war an dachenn disul.

Chardonnet, 4,5. Ar c’habiten a vez bepred a-us pa vez an holl beuzet en difenn.

Brassier, 2,5. Ur c’hrogad c’hwitet penn-da-benn. War a seblant e vo kroget gantañ adarre ar c’hrogad gant m’eo Fadiga marteze un tamm gloazet c’hoazh.

Belkebla, 5. Pal kentañ e Lig 1 evit ar c’hreizer beuzet d’ar penn-kentañ hag en deus kaset a-benn ar respont brestad.

Lees-Melou, 4,5. Pouezus e vo er c’hreiz. Erlec’hiet gant Le Douaron (87mn) hag a zo c’hoazh e Brest ar bloaz-mañ.

Belaïli, 3. Re nebeut a strivoù graet gantañ hag a-wechoù an arzour a glask re bezañ an haroz. C’hoari simpl, n’eo ket grevus. Erlec’hiet gant Magnetti (74mn).

Pereira-Lage, 4,5. Pouezus e vo er c’hreiz (bis).

Honorat, 4. Chom e Brest mar plij.

Cardona, 2,5. Steve a rank dont en-dro met ret eo kavout dreist-holl un 9 nevez. Erlec’hiet gant Del Castillo (74mn) hag a vo gwelet war a seblant a-enep da V/Marsilha.

Ar pennoù war-zu ar c’hrogad a-enep da V/Marsilha, bremañ.

Ar gortadennoù a-raok ar c’hrogad a-enep da V/Marsilha :

Brieuc.

‘Vel m’eo bet laret a-raok, n’eo ket bet kreñv ar Vrestiz e Lens. Ret e vo dihuniñ neuze a-enep da V/Marsilha, trec’h war Reims (4–1). Gant palioù e c’hoarierien nevez Tavares ha Suarez, hag a c’hoario e ti Francis gant Alexis Sanchez, erruet e Su Bro-C’hall dimeurzh.

Ne vo ket aes tamm ebet da 8e45 noz daoust ma vo c’hoariet er gêr, evit ar wech kentañ ar bloaz-mañ. Ezhomm ‘vo c’hoarierien entanet ha gant c’hoant. Ha gwelet eo bet e Lens e oa ret kavout un tager all eus ur C’h/Cardona a live izel adarre, peogwir eo gloazet Mounié. Diouganañ ar c’hrogad a seblant neuze aes e-keñver ar pezh a zo bet kaset a-benn gant an daou skipailh hag al lusk. An holl a c’hall neuze ijinan ur c’hrogad evel ar bloaz o tremenet a-enep da V/Marsilha lec’h ma oa bet trec’het ar Vrestiz d’un doare taer 1–4. Neuze, ijin a ran ur c’hrogad rampo gant palioù a bep tu. Ret e vo kaout Brestiz souezhus ha c’hoantus war an dachenn.

2–2. Honorat ha Chardonnet evit Brest. Bakambu ha Suarez evit Marsilha.

Arabat e vo bezañ beuzet evel ar bloaz tremenet e ti Francis (1–4).

Ar skipailh brestad ‘m eus c’hoant gwelet : Bizot — Duverne, Chardonnet (K), Dari, Brassier — Belkebla, Lees-Melou — Honorat, Pereira-Lage/Belaïli, Del Castillo — Cardona.

Forzh penaos piv a zo mod all ? Magnetti, Belaïli pe c’hoazh Karamoko a c’hell ober an diforc’h o tont ‘maez ar bank met petra gortoz gant ma vo zevezant Mounié ? Cardona a zo an argader/niverenn 9 nemetañ, o c’houzout ‘vefe diaes gant Le Douaron ha c’hoazh gwashoc’h gant ar yaouank a G/Camblan d’ober un dra o unan e penn. Ya, klasket e vo tapout poentoù a-enep da V/Marsilha gant un argader hag a zo o c’hoari a-dreuz tout abaoe ur bloaz bremañ. Gortozet ‘vez ar C’h/Cardona kollet neuze. Met ne vefe ket ken fall neuze da gaout un tager evit erlec’hiañ pe sikour Mounié pa vo distro.

Bec’h dezhi Brestiz !

. Fotoioù : SB29

. Adkavit Stad Brestiz war Twitter, Instagram ha Facebook : @Brestbzhg.

. @BrieucFurluking sikouret gant Mai.